سنه قوربان

یازار :   احسان

گجه گوردوم قورولوب مجلس اعيان سنه قربان

نجه مجلس ديه سن روضه ي رضوان سنه قربان

بير طرفده اوتوروب مفته يين لر هاموسي

بير طرفده سالنيب سفره ي الوان سنه قربان

بير اوجا صوتيله گوردوم كه چاووش سسلنيري

 مكه دن گلده جماعت حاجي بهمان سنه قربان

من ده چيخديم كوچه يه تا كي گورم وار نه خبر

گوردوم اطرافه آليب قيز گلين اوغلان سنه قربان

صف چكيب دوره ليب چاپلوس آداملار حاجي ني

هچ ولايتده پوزولماز بيله بوستان سنه قربان

او جماعت آراسيندا آق عرقچينده حاجي

گوبلك تك باش آچيب اولدي نمايان سنه قربان

حاجي پول خرج ايليب آلدي لقب اولدي حاجي

عيبي يوخدور اولا يا اولمويا ايمان سنه قربان

خبر آلديم حاجيدان شيطانا داش وورماقيني

ديدي آتديم داشي گولدو منه شيطان سنه قربان

ديديم حاضر اولا بيلدون كسن اسماعيليوي

ديدي فكر ايله مديم بو ايشه اصلان سنه قربان

آللاديب آللاداجاق ملته تزويرچي لر

آللانيب آلاناجاخ قيز ، گلين ، اوغلان سنه قربان

خواب غفلتده ياتيپ خورنا چكر ملت هامو

باسيپ حتما بو گجه ملتي يورقان سنه قربان

ايتيميز قورتا دونوپدور قويونون واي حالينا

داها مشكل تاپيلا ايچماقا ايران سنه قربان

دره لر خلوت اولوپدور ، تولكي لر بيگ بزنيب

يازليپدير خروزين قتلينه فرمان سنه قربان

زور و تزويريله زر باخ كي نجه ال بير اولوب

جاليب ير أوزونه ، سو يرينه قان سنه قربان

دمكراسي هارا بس كنده و زنجيره هارا

روا بيلمز بو ايشي حيوانا حيوان سنه قربان

وار اميديم داغيلا بتكده بتلار سينالار

اولا تا كاخ ستم خاكيله يكسان سنه قربان


  • [ ۱ ]